Tres Mensahe Kósmiko

E Mensahe di e Tres Angelnan

---

Riba 15 di òktober 1844, un siman promé ku e Gran Desapunto, un mucha hòmber a nase den un famia luterano piadoso na Alemania. Su nòmber tabata Friedrich Nietzsche, ku lo a bira un di e ateistanan di mas influensia di aktualidat. Keriendo ku e Dios kristian tabata kabando, Nietzsche tabata kritiká e influensia moral kontinuo di e religion kristian, ridikulisando e komo un “moralidat di katibu”, e moralidat di esnan suak ku, den un intento pa protegé nan mes for di e noshonnan mas fuerte, inventá, asina kèns manera “Stima bo enemigunan”. Pa Nietzsche, aktualidat mester a yega mas ayá di noshonnan antikuá di “bon i malu”; un personahe den un di su bukinan (Thus Spake Zarathustra) a deklará: “Kibra e tablanan di lei bieu!” (ku ta nifiká, naturalmente, e Dies Mandamentunan).

E aña 1844 tabata importante tambe pa Karl Marx, e fundadó di komunismo. Yamá e “Manuskritonan Ekonómiko i Filosófiko di 1844”, Marx a skirbi e obra akí e aña ei, asta si Union Soviétiko no a publik’é te na 1932. E manuskritonan ta mustra e desaroyo trempan di Marx su ideologia den kua e tabata argumentá pa un realidat totalmente materialista ku tabata move a traves di vários fasenan ekonómiko te ora e obreronan di mundu lo a uni, derotá nan opresornan kapitalista, i krea un utopia riba tera.

Aña 1844 tabata unu importante pa Charles Darwin tambe. Den loke a bira konosí komo e “Komposishon di 1844”, Darwin a produsí un di e ekspreshonnan di mas promé di su teoria evolushonista, asta si nan no a hasié públiko na e momento ei. Solamente na 1859, ku publikashon di On the Origin of Species, Darwin a anunsiá su punto di bista públikamente ku tur bida riba tera a originá for di un antepasado komun pa medio di prosesonan natural i kasual so.

Aña 1844 tabata, sinembargo, e kumplimentu di e profesia di 2300 dia di Daniel 8:14, i e mesun aña ku, for di e restunan di e Gran Desapunto, a planta simianan ku lo a brota den un movementu mundial ku su mensahe prinsipal tabata repudiá e kontenido di ideologia marksista, nietzseano, i darwiniano.

Kontrali na Marx, e movementu atventista di shete dia a proklamá ku e gran konflikto entre Kristu i Satanas, no un fluho materialista di historia, tabata splika historia di mundu ku lo a terminá, no den un utopia komunista trahá pa hende sino den establesimentu di e reino eterno di Dios.

Kontrali na Darwin, e movementu atventista di shete dia a siña ku bida a originá, no den e proseso natural i kasual di mutashon aksidental i selekshon natural, sino pa medio di e poder di e Kreador Dios, kende den seis dia a krea bida riba tera i a sosegá riba e di shete.

I kontrali na Nietzsche, e movementu atventista di shete dia a proklamá, no solamente ku Dios ta eksistí sino ku Su kódigo universal di moralidat (e “tablanan di e Lei Bieu”), e Dies Mandamentunan, ta keda Dios Su norma final di huisio i obligatorio pa henter humanidat.

Un koinsidensia ku tur e eventonan akí a tuma lugá den 1844? Hende no mester pensa asina.

Marx, Nietzsche, Darwin, tres figura di influensia kende nan obra a kousa humanidat daño ireparabel. Pero meimei di tur e erornan akí, Dios no a laga mundu sin un testimonio na Su bèrdat, pa kua motibu, meimei di e ideologianan destruktivo akí, El a lanta un movementu ku, despues di tempu, lo a transformá su mes den Iglesia Atventista di Shete dia i ku lo a proklamá Su bèrdat di último dia na e mundu, e mensahenan di e tres angelnan. Esakinan ta mensahenan ku, básikamente, ta refutá e erornan i konseptonan eróneo promové pa e tres hòmbernan teriblemente engañá ei.

E mensahenan di e tres angelnan ta, den un sentido, e òrdunan di marcha di Iglesia Atventista di Shete dia. I básikamente, nan ta e evangelio, puru i simpel, ma e evangelio presentá den konteksto di “bèrdat presente” (2 Pe. 1:12, NKJV).

I esaki, e mensahenan di e tres angelnan, ta nos estudio pa e kuartal.